اردو محاورے (ل اور م )

 

لاج رکھنا: 

عزت رکھنا: اللہ نے میری لاج رکھ لی اور میری بیٹی کی شادی خیر و عافیت سے سرانجام پائی۔

لمبی تان کر سونا: 

بے فکر ہو کر سونا: امتحانات سر پر ہیں اور علی لمبی تان کر سو رہا ہے۔

لگی لپٹی نہ رکھنا: 

صاف صاف کہہ دینا: عابدہ بیگم لگی لپٹی رکھنے کی عادی نہیں اسی لیے گھر کے معاملات میں ہمیشہ سچائی سے کام لیتی ہیں۔

لکیر کا فقیر ہونا: 

پرانی رسموں کا پابند ہونا: آج کل کے دور میں جو لکیر کا فقیر ہے وہ زمانے کے ساتھ نہیں چل سکتا۔

لوہا منوانا: 

بڑائی تسلیم کروانا: پاکستانی افواج نے پوری دنیا میں اپنی بہادری کا لوہا منوا لیا ہے۔

لوہے کے چنے چبانا: 

سخت محنت کا کام: کان میں کام کرنے والے مزدوروں کو لوہے کے چنے چبا کر اپنے لیے روزی کمانی پڑتی ہے۔

لیت و لعل کرنا:

ٹال مٹول کرنا: علی نے مجھے قرض دینے کا وعدہ کیا تھا لیکن اب لیت و لعل سے کام لے رہا ہے۔

لینے کے دینے پڑ جانا: 

فائدے کی بجائے نقصان ہونا: ایٹمی دھماکے کر کے بھارت کو لینے کے دینے پڑ گئے۔

لٹیا ڈبونا:

کام بگاڑنا: میٹرک میں فیل ہو کر اکبر نے اپنے غریب باپ کی لٹیا ڈبو دی ہے۔

لہو کے گھونٹ پینا: 

غصہ ضبط کرنا: افضل صاحب نے جب اپنے بیٹے کے کرتوت دیکھے تو لہو کے گھونٹ پی کر رہ گئے۔

لہو لگا کر شہیدوں میں ملنا: 

تھوڑا سا کام کر کے زیادہ شہرت چاہنا: اس سارے کام میں اگرچہ اکبر کا زیادہ حصہ نہیں لیکن وہ لہو لگا کر شہیدوں میں شامل ہونا چاہتا ہے۔

ماتھا ٹھنکنا:

شک ہونا: گلی میں کچھ لڑکوں کی مشکوک سرگرمیاں دیکھ کر میرا ماتھا ٹھنکا اور میں نے پولیس کو اطلاع کر دی۔ 

ماتھا رگڑنا: 

خوشامد کرنا: غریب لڑکے نے بہت ماتھا رگڑا لیکن اسے نوکری نہ دی گئی۔

مارے مارے پھرنا: 

آوارہ پھرنا: بے روزگاری، سفارش اور مہنگائی کے باعث اعلی تعلیم یافتہ لڑکے مارے مارے پھر رہے ہیں۔

مٹھی گرم کرنا:

رشوت دینا: جب جب تک مٹھی گرم نہ کی جائے تو بڑا کیا چھوٹا کام بھی نہیں ہوتا۔

مکھیاں مارنا: 

بیکار بیٹھنا: لوڈ شیڈنگ کے باعث کام بند ہے اور ملازمین مکھیاں مار رہے ہیں۔

منہ پر ہوائیاں اڑنا: 

رنگ فق ہونا: جھوٹ کھل جانے پر اصغر کے منہ پر ہوائیاں اڑنے لگیں۔

منہ سے پھول جھڑنا:

نہایت خوش بیاں ہونا: اس کے شعر کہنے کا انداز ایسا تھا گویا منہ سے پھول جھڑ رہے ہوں۔

منہ کی کھانا: 

شکست کھانا: غزوہء بدر میں کفار کو منہ کی کھانا پڑی۔ 

منہ لگانا: 

دوست بنانا: مطلب پرست اور خوشامدی کو منہ لگانا اپنا نقصان آپ کرنا ہے۔

منہ دکھانا مشکل ہو گیا: 

شرمندگی کے باعث سامنا نہ کر پانا: قرض کی رقم وقت پر ادا نہ کرنے کے باعث سمیع صاحب کو منہ دکھانا مشکل ہو گیا تھا۔

منہ میں دانت نہ پیٹ میں آنت:

انتہائی بوڑھا: انہیں دیکھو منہ میں دانت نہ پیٹ میں آنت اور اس عمر میں شادی کی سوجھی ہے۔

منہ سے بولے نہ سر سے کھیلے: 

بالکل خاموش اور ساکت: ارے اس بچے کو کیا ہو گیا ہے، منہ سے بولے نہ سر سے کھیلے، کسی ڈاکٹر کو دکھاؤ۔

میدان صاف ہے: 

کوئی روک ٹوک نہیں: ساس کے جانے کے بعد میدان صاف تھا، اب بہو ہی سارے گھر پر قابض تھی۔

موم کی ناک ہونا: 

اپنی کوئی رائے نہ رکھنا: چھوٹے بچے موم کی ناک کی طرح ہوتے ہیں انہیں جس طرح چاہو ڈھال لو۔

ماتھا پیٹنا: 

سر پیٹنا: اپنے شوہر کی فضول خرچیوں پر رشیدہ نے ماتھا پیٹ لیا۔